星期四, 3月 08, 2007

與媽媽的幾段對話

關於抽煙
場景1:媽最近不知怎的開始學抽煙,上回鄉探親在婆婆家,飯後她在抽一不知名煙
我:你又食煙,仲係婆婆面前
媽:(不回應,光吞雲吐霧)
我:咩煙黎,俾我試一啖
媽:唔好,女仔唔好食煙
我:車,你唔係女人?!你估我未食過咩,我想試下個味炸麻。
媽:邊個教你食煙呀,係未derek?
我:咁大個人,咩未試過?洗咩人教架。煙都唔好食既,我都唔會上癮,雪茄好d,無咁傷,不過都唔中意食,不如你食雪茄啦,你唔好成日食煙添呀,個肺一陣黑哂。
媽:無聲出
我:俾我試一啖
媽:(給我抽了一口)
我:淡淡地,幾好喎
家姐突然出現:阿媽你又食煙!!?
媽:食煙真係會上癮

場景2:姐的派對上我跟媽悶得慌
媽:好想食煙
我:你咪食囉
媽:家姐唔俾
我:生日大哂咩,仲咩唔准你食,我批准你啦(作為一個成年人,她完全有個人自由,見她咁慘,我掏手進她手袋找,找不到)
媽:都無帶出黎
我:咁你問隔離個個人(家姐的朋友)借一支啦
結論:媽給我縱壞

關於夜歸
場景:我在廳工作,媽媽大概下午三時才起床
我:你尋晚幾點番,又玩到天光先番黎?
媽:係呀,6,7點,唱k麻
我:你唔好成日嗌到把聲沙哂啦,四十幾歲人,你估後生咩
媽:最後一次嘞
我:成日捱夜好難補番架,通一日頂起碼補三日呀,四十幾又唔係廿幾,我依家都唔通得頂啦,又唔係聽日無得玩,你番黎個時要小心d呀...(下刪六百字)

關於購物
場景 1:昨晚跟她在街上四圍行,她跟我作生意上的預告
媽:今次台灣個水貨可能好肥
我:(開心)咁咪好囉,賺到錢唔好亂買野,要儲起佢,知麻,成日亂買野
媽:幾時有亂買野呀?
三秒後
媽:買個nokia既新電話俾你好唔好,2千幾,幾靚
我:唔好唔好,唔好亂買住,費時又唔見
前面有個女路人手挽一個大路易維登手挽
媽:前面個女仔個手袋靚唔靚
我:幾靚,靚個你手上面拎個個(她個個較小,感覺大女人)
媽:好靚喎,咁大個可以買黎上廣州帶貨,又可裝一兩件衫,我拎緊依個唔夠裝呀(開始合理化自己去買它)
我:邊岩你用架,成個書包咁,我用就差唔多,或者你著到佢咁就ok,都唔襯你d衫
媽:真係好靚喎,點算,好靚呀,好想要呀(明顯想立即買)
我:個頭先叫你唔好亂買野!!話口未完!你唔好買啦!貴到死!儲錢啦!
媽:卡卡笑
結論:肯定從緬甸回來後會又拉我去陪買。

場景2:家,媽穿一超舒服咖啡色羊仔皮褸
我試穿:好舒服呀(我完全resist唔到羊仔皮既物件)貴唔貴,係邊度買
媽:係琛圳,4千幾
目瞪口呆:4千幾你都買?!?!?!4千幾可以買80本書?!4千幾唔洗係琛圳買啦小姐(雖則如此,我邊說邊肉赤一邊輕撫褸面,真係好好好舒服)你發左達都唔好4千蚊買件褸啦..(下刪六百字)
媽:折左2千幾
竟然即刻講大話!

3)前兩天飯廳椅上掛一件黑色羊仔皮biker,見媽時立即審問
我:你又整件皮褸番黎
媽:借架,個auntie借黎著架
又講大話!!!!皮褸會借黎借去架咩?

4)媽穿新boots,款式不土
媽:靚唔靚?
我試穿:幾好喎,係邊度買
媽:廣州,100蚊一對
我:咁平,又唔覺
媽:我買左5對,放哂係廣州度
我嚇一跳:咁都唔洗買5對呀,你一個人幾多對腳呀,可以著三個冬天嘞?
我:快d攞d番黎俾我著(笑)
媽:其他款好老土又女人,唔岩你
我:自私鬼,買5對一對都唔買俾人!


媽媽中佢都算幾唔生性(笑)。

2 則留言:

anqines 說...

我們其實都係似足媽咪

匿名 說...


你呀媽好in喎